საიტი მუშაობს სატესტო რეჟიმში

17.09.2020

IV კატეგორიის საწარმოებისთვის ანგარიშგების წარდგენა 2020 წელს სავალდებულო არ არის

სამსახური IV კატეგორიის საწარმოებს შეგახსენებთ, რომ „ბუღალტრული აღრიცხვის, ანგარიშგებისა და აუდიტის შესახებ“ კანონში 2019 წელს განხორციელებული ცვლილების საფუძველზე, აღნიშნული კატეგორიის საწარმოებს არ ევალებათ 2019 წლის ფინანსური ანგარიშგების წარდგენა 2020 წლის 1 ოქტომბრამდე. 

ამასთანავე, შეგახსენებთ, რომ IV კატეგორიის საწარმოების ფინანსური ანგარიშგება უნდა მომზადდეს ფინანსური ანგარიშგების გამარტივებული სტანდარტით, თუ საწარმომ სამოქმედოდ არ აირჩია კანონით დაშვებული სხვა, უფრო მაღალი რანგის სტანდარტი. 

აღსანიშნია, რომ IV კატეგორიის საწარმოებს შეუძლიათ ნებაყოფლობით წარადგინონ სამსახურში 2019 წლის ანგარიშგებები, მათ შორის შესადარისი ინფორმაციით. ამგვარი ფინანსური გამჭვირვალობა მომავალში ხელს შეუწყობს მოცემულ ბიზნეს-სეგმენტს ფინანსებზე ხელმისაწვდომობის ზრდაში და საქმიანი ურთეიერთობების განვითარებაში. კერძოდ, წარდგენილი ანგარიშგებები, სისტემაში პროგრამული თანხმობის შემთხვევაში, მიეწოდება საქართველოს ეროვნულ ბანკში რეგისტრირებულ საკრედიტო საინფორმაციო ბიუროს, რომელიც თავის მხრივ, ამ და სხვა ინფორმაციის გამოყენებით, საწარმოს საკრედიტო რეიტინგს შეიმუშავებს. ამგვარი სარეიტინგო ქულის არსებობა საწარმოებს საგრძნობლად გაუმარტივებს ბანკებთან და სხვა საფინანსო ინსტიტუტებთან ურთიერთობას. 

გარდა ამისა, დაინტერესებული პირები reportal.ge-ზე წარდგენილი ანგარიშგებების ნახვას შეძლებენ საწარმოსგან შესაბამისი თანხმობის მიღების შემთხვევაში (თანხმობის მიღების პირობების გაცნობა შესაძლებელია ანგარიშგების წარდგენის წესის 22-ე მუხლში).

გთხოვთ, გაითვალისწინოთ, რომ 2021 წელს, მეოთხე კატეგორიის საწარმოებმა სამსახურს უნდა წარუდგინონ 2020 წლის ანგარიშგების სრული პაკეტი. სტანდარტის მე-3 განყოფილების შესაბამისად, ანგარიშგების სრული პაკეტი სულ მცირე უნდა მოიცავდეს შემდეგ ინფორმაციას: 

1. ფინანსური მდგომარეობის ანგარიშებას 2020 წლის საანგარიშგებო პერიოდის დასასრულისთვის და 2019 წლის საანგარიშგებო პერიოდის როგორც დასასრულისთვის, ასევე დასაწყისისთვის;
2. შემოსავლების, ხარჯებისა და გაუნაწილებელი მოგების ანგარიშგებას 2020 და 2019 წლების საანგარიშგებო პერიოდებისთვის.

© ბუღალტრული აღრიცხვის, ანგარიშგებისა და აუდიტის ზედამხედველობის სამსახური. 2018