სიახლეები

2 დეკემბერს, 14:00 საათზე, სამსახური (SARAS) ფინანსური ანგარიშგების საერთაშორისო სტანდარტების ფონდთან (IFRS Foundation) თანამშრომლობით, მეცხრე ყოველწლიურ ღონისძიებას მართავს, რომლის სამიზნე აუდიტორიას წარმოადგენენ აუდიტორები, აუდიტორული ფირმები და იმ საწარმოების წარმომადგენლები, რომლებიც კანონის მოთხოვნით ან ნებაყოფლობით ამზადებენ ფინანსურ ანგარიშგებებს ფინანსური ანგარიშგების საერთაშორისო სტანდარტების (IFRS) ან მცირე და საშუალო საწარმოების ფინანსური ანგარიშგების საერთაშორისო სტანდარტის (IFRS for SMEs) შესაბამისად. 

შეხვედრის მიზანია დაინტერესებული მხარეებისთვის დროული და სიღრმისეული ინფორმაციის მიწოდება ბუღალტრული აღრიცხვის დარგში არსებულ სიახლეებთან და ცვლილებებთან დაკავშირებით, რაც ანგარიშგების ხარისხის გაუმჯობესებას შეუწყობს ხელს.  

შეხვედრის მომხსენებელი გახლავთ ბრიუს მაკენზი, ბუღალტრული აღრიცხვის საერთაშორისო სტანდარტების საბჭოს (IASB) წევრი, რომელიც მონაწილეებს დეტალურად გააცნობს ფასს სტანდარტებსა და მსს ფასს სტანდარტთან დაკავშირებულ ცვლილებებსა და სიახლეებს. ღონისძიება ინტერაქციული ხასიათის იქნება, შესაბამისად, მონაწილეებს საშუალება მიეცემათ მათთვის საინტერესო საკითხებზე უშუალოდ მომხსენებლისგან მიიღონ კომპეტენტური პასუხები. 

ღონისძიება ონლაინ ფორმატში გაიმართება. დასწრების მსურველთათვის სავალდებულოა სარეგისტრაციო ფორმის შევსება. 

იხილეთ ღონისძიების დღის წესრიგი.