სიახლეები

როგორც ცნობილია, 2022 წელს, ევროკომისიამ კორპორაციული მდგრადობის ანგარიშგების დირექტივა (CSRD) შეიმუშავა, რომელიც 2023 წლის 5 იანვრიდან შევიდა ძალაში ევროკავშირის წევრი ქვეყნებისთვის. აღნიშნულმა დირექტივამ აქამდე არსებული არაფინანსური ანგარიშგების დირექტივა ჩაანაცვლა – განახლებული რედაქციითა და მოთხოვნებით.

სამსახურისა და მსოფლიო ბანკის წარმომადგენელმა შეხვედრაზე საქართველოს საბანკო სექტორისა და საქართველოს საბანკო ასოციაციის წარმომადგენლებს გააცნეს ევროკომისიის მიერ შემუშავებული კორპორაციული მდგრადობის ანგარიშგების დირექტივის ზოგადი არსი და მოთხოვნები. შეხვედრაზე, ყურადღება გამახვილდა იმ მნიშვნელოვან საკითხებზე, რომლებიც ევროკომისიის მიერ შემუშავებულ დირექტივას გააჩნია. კერძოდ, კომპანიის მიერ გარემოსდაცვითი და სოციალური რისკების შესახებ ინფორმაციის გამჟღავნების მოთხოვნა, რომელიც საწარმოებს უბიძგებს ანგარიშში წარმოადგინონ არა მხოლოდ გავლენა საკუთარ ბიზნეს მოდელზე, არამედ როგორ ახდენს ეს გავლენა გარემოსა სოციალურ საკითხებზე. ახალი რეგულაციები აძლიერებს ბიზნეს სექტორს და უზრუნველყოფს მწვანე ეკონომიკის ხელშეწყობას, რაც მნიშვნელოვანი იქნება ინვესტორებისთვის, სამოქალაქო საზოგადოების წარმომადგენლებისთვის და მომხმარებლებისთვის. შეხვედრაზე სამსახურის წარმომადგენლებმა მსჯელობაში მიიღეს მონაწილეობა და  მათთვის დასმულ კითხვებს უპასუხეს. 

ბუნებრივია, საქართველოში ახალი დირექტივის დანერგვა კომპლექსური პროცესია, რომელიც ეტაპობრივად განხორციელდება.შეხვედრის ფარგლებში საწარმოებს მიეწოდათ ინფორმაცია სამსახურის გეგმიური აქტივობების შესახებ, რაც ემსახურება კორპორაციული მდგრადობის ანგარიშგების წარდგენის ვალდებულების შემოღებას საქართველოში. სამსახურის მიერ ასევე გაცხადდა მიდგომა, რომ საკითხზე მუშაობის პროცესში, სამსახური ღიაა დაინტერესებულ მხარეებთან კომუნიკაციისა და მოსაზრებების მისაღებად. ასევე, დაინტერესებულ პირებს მიეწოდათ ინფორმაცია, რომ დაგეგმილია "ბუღალტრული აღრიცხვის, ანგარიშგებისა და აუდიტის შესახებ" საქართველოს კანონში ცვლილების შეტანა. 2025 წლისთვის კი სამინისტრო და მთავრობა განიხილავენ კანონპროექტის წარდგენას შემდგომი ინიცირების მიზნით.

სამსახური, დინამიური აპროქსიმაციის ფარგლებში,  ევროკავშირის მოთხოვნებთან თანხვედრის უზრუნველსაყოფად, გეგმავს მუდმივად ითანამშრომლოს ევროკავშირის წევრ ქვეყნებთან და ექსპერტებთან. ამ პროცესში უმნიშვნელოვანესია კორპორაციული მდგრადობის ანგარიშგების სტანდარტების  საქართველოში დანერგვა და მარეგულირებელი დირექტივის შესაბამისი შედეგების მიღწევა.