სიახლეები

 ბუღალტრული აღრიცხვის, ანგარიშგებისა და აუდიტის ზედამხედველობის სამსახური (SARAS) რეგიონული საინფორმაციო შეხვედრების ციკლს გამართავს, რომლის მთავარი თემაა „ხარისხიანი ფინანსური ანგარიშგება: მსს ფასს-ისა და მეოთხე კატეგორიის სტანდარტების პრაქტიკული გზამკვლევი". ღონისძიებები მიზნად ისახავს ხელი შეუწყოს მცირე, საშუალო და მიკრო  საწარმოებს,  სტანდარტთან შესაბამისი, მაღალი ხარისხის, ფინანსური ანგარიშგებების მომზადებასა და წარდგენაში.

შეხვედრები მიმდინარე წლის ნოემბერში, საქართველოს ოთხ ქალაქში გაიმართება:

 - 24 ნოემბერი, 12:00 საათი,  ქ. ბათუმი. მისამართი: ბაქოს ქ. №8, ფინანსთა სამინისტროს აკადემიის ბათუმის ფილიალი.

- 25 ნოემბერი, 12:00 საათი, ქ. ქუთაისი. მისამართი: რუსთაველის ქ. №3, ქუთაისის მერიის შენობა, II სართული, კაბინეტი 210.

- 27 ნოემბერი 12:00 საათი,  ქ. გორი. მისამართი: გრ. ფერაძის ქ. №5. გორის მუნციპალიტეტის მერია,  საკონფერენციო დარბაზი (პირველი სართული).

- 28 ნოემბერი, 13:00 საათი, ქ. ახალციხე. მისამართი: შ. ახალციხელის ქ. №2. საკრებულოს შენობა, პირველი სართული.

შეხვედრების ციკლის ფარგლებში დეტალურად განიხილება მსს ფასს-ისა და მეოთხე კატეგორიის სტანდარტების სტრუქტურა. მონაწილეები მიიღებენ პრაქტიკულ რჩევებსა და გზამკვლევებს იმის შესახებ, თუ როგორ უნდა უზრუნველყოს საწარმომ ანგარიშგების ხარისხი და აღნიშნული სტანდარტების მოთხოვნებთან შესაბამისობა.

განსაკუთრებული ყურადღება დაეთმობა შემდეგ საკითხებს:

- სტანდარტების მოთხოვნებთან შეუსაბამობის შემთხვევების, მათ შორის საწარმოების მიერ ანგარიშების პროცესში ხშირად დაშვებული შეცდომების განხილვა;

- წარმოდგენილი იქნება ნიმუშები და კონკრეტული მაგალითები იმის შესახებ, თუ როგორ უნდა იყოს სწორად მომზადებული გარკვეული ტიპის განმარტებითი შენიშვნები;

- წარმოდგენილი იქნება საკანონმდებლო და იურიდიული ასპექტები.

ღონისძიების დასასრულს დრო დაეთმობა კითხვა-პასუხის სესიას, რაც მსმენელებს საშუალებას მისცემს, მათთვის საინტერესო საკითხებსა და გამოწვევებზე მიიღონ პასუხები. 

SARAS-ის ინიციატივა მნიშვნელოვანი წინგადადგმული ნაბიჯია, რათა გაიზარდოს მცირე, საშუალო და მიკრო საწარმოების ფინანსური ანგარიშგებების ხარისხი და სტანდარტთან შესაბამისობა.