სიახლეები

SARAS -ის ინიციატივითა და მსოფლიო ბანკის მხარდაჭერით, მიმდინარე წლის 6-10 ოქტომბერს, სამსახურისა და საქართველოს ფინანსთა სამინისტროს ანალიტიკური სამსახურის თანამშრომლებისთვის, თემაზე „Embracing Digital Financial Reporting“, სამუშაო შეხვედრების ციკლი გაიმართა ფიზიკურ სივრცეში. შეხვედრების მიზანია კომპეტენციების გაძლიერება XBRL-ზე დაფუძნებული ციფრული ანგარიშგების დანერგვისთვის, ტაქსონომიის, არქიტექტურის, ანგარიშგების კომპონენტებისა და ვალიდაციის პროცესების გააზრებით, სერტიფიცირებული პროგრამული ინსტრუმენტების სწორი გამოყენებით და მონაცემების ანალიტიკურ სისტემებში ინტეგრირებით.

შეხვედრებს ხელმძღვანელობდა მსოფლიო ბანკის მოწვეული ექსპერტი სტიუარტ როუდანი, რომელსაც მრავალწლიანი გამოცდილება აქვს XBRL ტექნოლოგიებში, სტანდარტებსა და ციფრულ ანგარიშგებაში.

მიმდინარე შეხვედრების ციკლი მოიცავდა XBRL ტექნოლოგიის დანერგვისთვის მნიშვნელოვან მიმართულებებსა და თემებს, მათ შორის:

• XBRL-ის ტექნოლოგიის საფუძვლებსა და ტაქსონომიის არქიტექტურას

• ანგარიშგების კომპონენტებს, ფორმატებსა და ვალიდაციის პროცესებს

• ციფრული მონაცემების ინტეგრაციას მონაცემთა ბაზებსა და ანალიტიკურ სისტემებში

ტესტირებას, ხარისხის უზრუნველყოფასა და რეგულაციების დაცვას.

სამუშაო შეხვედრების შედეგად, უკეთესად წარიმართება ციფრულ ანგარიშგებაში XBRL ტექნოლოგიის ეფექტიანად დანერგვის დაგეგმვის პროცესი, რისთვისაც სამსახური მადლობას უხდის მსოფლიო ბანკს.

XBRL (eXtensible Business Reporting Language) არის გლობალური სტანდარტი, რომელიც უზრუნველყოფს ფინანსური და არაფინანსური მონაცემების სტრუქტურირებულ, ციფრულ ფორმატში წარმოდგენას. მისი დანერგვა მნიშვნელოვნად ზრდის ანგარიშგების წარდგენის მოქნილობას, ასევე გამჭვირვალობას, სანდოობასა და მონაცემებზე დაფუძნებული გადაწყვეტილებების მიღების შესაძლებლობას. დღეს მსოფლიოში სულ უფრო მეტი ქვეყანა გადადის XBRL-ზე, რაც აძლიერებს საერთაშორისო სტანდარტებთან შესაბამისობასა და ინვესტორთა ნდობას.

SARAS აქტიურად მუშაობს XBRL სტანდარტზე გადასვლაზე, რომელიც უზრუნველყოფს ზედამხედველობითი პროცესების თანამედროვე სტანდარტებთან შესაბამისობას და უწყების საქმიანობის ეფექტიანობას. რაც მთავარია, საწარმოებისათვის ანგარიშგების ხარისხის, გამჭვირვალობისა და მონაცემთა დამუშავების გაზრდას. აღნიშნული პროცესი ხელს უწყობს კაპიტალის ბაზრის განვითარებას და სტაბილურობის განმტკიცებას. შეხვედრის ჩატარება სწორედ ამ პროცესის მნიშვნელოვანი ნაწილია.  

ნიშანდობლივია, რომ მიმდინარე შეხვედრების ციკლი არის XBRL ტექნოლოგიის დანერგვის პირველი ეტაპი. სამსახური აქტიურად აგრძელებს მუშაობას, ხსენებულ საკითხზე, სამომავლოდ დაიგეგმება შესაბამისი შეხვედრები დაინტერესებულ პირებთან, რათა საწარმოებს და ყველა ჩართულ მხარეს მიეწოდოს საჭირო ინფორმაცია, რაზეც სამსახური ეტაპობრივად მიაწოდებს საზოგადოებას ინფორმაციას.

გარდა ამისა, XBRL სტანდარტის დანერგვა შესაძლებელს გახდის ქართული კომპანიების ანგარიშგებები საერთაშორისო პლატფორმაზე განთავსდეს. ეს პლატფორმა საშუალებას აძლევს ნებისმიერ საერთაშორისო მასშტაბით დაინტერესებულ პირს ან ინვესტორს იხილოს კომპანიების მიერ ხსენებული სტანდარტით მომზადებული ფინანსური ინფორმაცია.

SARAS-ის მიზანია, ერთობლივი ძალისხმევით, ქვეყანაში წარმატებით დაინერგოს საერთაშორისო სტანდარტი, რაც უზრუნველყოფს როგორც კაპიტალის ბაზრის, ისე მთლიანად ფინანსური ანგარიშგების სისტემის გაუმჯობესებას და სხვა მნიშვნელოვანი სარგებლის მიღებას, რაც XBRL სისტემას მოაქვს.