სიახლეები

ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა (SARAS), საქართველოს ფინანსთა სამინისტროს მხარდაჭერით, გამართა ღონისძიება თემაზე - „მდგრადობის ანგარიშგება და შესაბამისი მარწმუნებელი მომსახურება: საერთაშორისო გამოცდილება და მნიშვნელობა საქართველოსთვის“.

ღონისძიების მიზანი იყო მდგრადობის ანგარიშგებისა და მასთან დაკავშირებული მარწმუნებელი მომსახურების მნიშვნელობის წარმოჩენა, საერთაშორისო გამოცდილების გაზიარება და საქართველოში აღნიშნული მიმართულების განვითარებისთვის საჭირო პრაქტიკული საკითხების განხილვა. 

ღონისძიება გახსნა სამსახურის უფროსმა დავით მჭედლიძემ. მონაწილეებს მისასალმებელი სიტყვით მიმართეს საქართველოს ფინანსთა მინისტრის მოადგილემ ცოტნე ყავლაშვილმა, საქართველოს ეროვნული ბანკის საბჭოს წევრმა, პირველმა ვიცე-პრეზიდენტმა ეკატერინე მიქაბაძემ და პოლონეთის აუდიტის ზედამხედველობის სააგენტოს (PANA) ხელმძღვანელის მოადგილემ დარიუშ დანილიუკმა (Dariusz Daniluk).

შეხვედრის ფარგლებში განხილული იყო მდგრადობის ანგარიშგების როლი თანამედროვე კორპორაციული ანგარიშგების სისტემაში, მისი მნიშვნელობა კომპანიების გამჭვირვალობის, ანგარიშგების ხარისხისა და ინვესტორთა ნდობის ამაღლებისთვის. განსაკუთრებული ყურადღება დაეთმო მდგრადობის ანგარიშგების პრაქტიკულ მნიშვნელობას. აღინიშნა, რომ იგი სცდება დამატებითი ანგარიშგების ფორმალურ ჩარჩოს და კომპანიებისთვის წარმოადგენს მნიშვნელოვან ინსტრუმენტს საქმიანობის ფინანსური და არაფინანსური ასპექტების სრულყოფილად წარმოსაჩენად, რისკებისა და შესაძლებლობების შესაფასებლად და დაინტერესებული მხარეებისთვის სანდო, სტრუქტურირებული ინფორმაციის მისაწოდებლად.

ღონისძიებაში მონაწილეობა მიიღეს პოლონეთის აუდიტის ზედამხედველობის სააგენტოს (PANA) წარმომადგენლებმა, რაც საერთაშორისო გამოცდილების გაზიარების მნიშვნელოვანი კომპონენტი იყო. PANA-ს სტანდარტიზაციისა და საერთაშორისო თანამშრომლობის დეპარტამენტის დირექტორის მოადგილემ, ვალდემარ მაიეკმა, მონაწილეებს წარუდგინა ორი პრეზენტაცია. მონაწილეები გაეცნენ პოლონეთის პრაქტიკულ გამოცდილებას იმ საკითხებზე, რომლებიც მდგრადობის ანგარიშგებისა და შესაბამისი მარწმუნებელი მომსახურების დანერგვას, ზედამხედველობასა და პროფესიული პრაქტიკის განვითარებას უკავშირდება.ღონისძიების ფარგლებში გაიმართა ორი საჯარო განხილვა. პირველი დაეთმო მდგრადობის ანგარიშგების სარგებელსა და გამოწვევებს. განხილვაში მონაწილეობდნენ საქართველოს ეროვნული ბანკის, საქართველოს საპენსიო ფონდის, მსოფლიო ბანკისა და კერძო სექტორის წარმომადგენლები.

დისკუსიისას ყურადღება გამახვილდა მდგრადობის ანგარიშგების მნიშვნელობაზე კორპორაციული გამჭვირვალობის, ანგარიშგების ხარისხის, საინვესტიციო გადაწყვეტილებებისა და ბიზნესგარემოს განვითარების თვალსაზრისით.

მეორე საჯარო განხილვა მიეძღვნა მდგრადობის მარწმუნებელ მომსახურებას, მათ შორის მის როლს ე.წ. „მწვანე“ იმიჯით მანიპულაციების (greenwashing) რისკის შემცირებისა და ინვესტორთა ნდობის ამაღლების პროცესში. დისკუსიაში მონაწილეობდნენ საერთაშორისო აუდიტორული და საკონსულტაციო კომპანიების - „იუაის“ (EY), „დელოიტისა“ (Deloitte) და „გრანთ თორნთონ საქართველოს“ (Grant Thornton Georgia) წარმომადგენლები. განხილვის ფარგლებში საუბარი შეეხო მდგრადობის შესახებ მონაცემების ხარისხს, შიდა კონტროლის მექანიზმებს, პროფესიული კომპეტენციების განვითარებას, მტკიცებულებების მოპოვებასა და იმ ძირითად პრაქტიკულ საკითხებს, რომლებიც მარწმუნებელი მომსახურების სათანადოდ განხორციელებისთვის არის მნიშვნელოვანი.

მონაწილეებმა ასევე იმსჯელეს საქართველოში მდგრადობის ანგარიშგების განვითარების მიმართულებებზე. აღინიშნა, რომ პროცესი საჭიროებს ეტაპობრივ, პროპორციულ და პრაქტიკულ მიდგომას, რომელიც ერთდროულად გაითვალისწინებს საერთაშორისო სტანდარტებთან თავსებადობას, კომპანიების მზაობას, აუდიტორული სექტორის შესაძლებლობებსა და ბაზრის საჭიროებებს. დისკუსიისას ყურადღება გამახვილდა იმაზეც, რომ მდგრადობის ანგარიშგების ეფექტიანი დანერგვა მნიშვნელოვნად არის დამოკიდებული მარეგულირებელი უწყებების, ბიზნესსექტორის, აუდიტორული ფირმებისა და სხვა დაინტერესებული მხარეების კოორდინირებულ თანამშრომლობაზე.

ღონისძიებას ესწრებოდნენ აუდიტორები, აუდიტორული ფირმები, საწარმოები, საჯარო და კერძო სექტორის, მარეგულირებელი უწყებების, პროფესიული წრეების, პარტნიორი და დონორი ორგანიზაციების წარმომადგენლები.

ღონისძიება მოიცავდა კითხვა-პასუხის რეჟიმსაც, რამაც მონაწილეებს მისცა შესაძლებლობა, საერთაშორისო და ადგილობრივ ექსპერტებთან ერთად ემსჯელათ მდგრადობის ანგარიშგებისა და შესაბამისი მარწმუნებელი მომსახურების დანერგვასთან დაკავშირებულ პრაქტიკულ საკითხებზე.

ღონისძიება შეაჯამა სამსახურის უფროსმა დავით მჭედლიძემ. მან ყურადღება გაამახვილა მდგრადობის ანგარიშგებისა და მარწმუნებელი მომსახურების მნიშვნელობაზე საქართველოს კორპორაციული ანგარიშგების სისტემის შემდგომი განვითარებისთვის და აღნიშნა, რომ საერთაშორისო გამოცდილების გაზიარება, პროფესიული დიალოგი და დაინტერესებულ მხარეებთან თანამშრომლობა მნიშვნელოვანი წინაპირობაა აღნიშნული მიმართულების ეტაპობრივი და ეფექტიანი განვითარებისთვის.